Haukur Kristjánsson fæddist 3.
september 1913 á Hreðavatni í Norðurárdal í Mýrasýslu. Hann lést á
Droplaugarstöðum 8. maí 2001. Foreldrar hans voru
Kristján Gestsson bóndi á Hreðavatni, f. 21. desember 1880, d. 22. september
1949 og Sigurlaug Daníelsdóttir húsfreyja á Hreðavatni, f. 7. febrúar 1877, d.
8. febrúar 1974. Bræður hans voru Daníel, f. 1908, d. 1982, Gestur, f. 1910, d.
2000, Ingimundur, f. 1912, d. 2000, Magnús, f. 1916, Þórður, f. 1921 og
uppeldisbróðir Reynir Ásberg, f. 1931. Fyrri kona Hauks var Erla Axelsdóttir, f.
19. apríl 1924, d. 25. ágúst 1985. Þau skildu. Eftirlifandi eiginkona hans er
Svandís Matthíasdóttir húsfreyja, f. 13. september 1926. Foreldrar hennar voru
Matthías Ásgeirsson skattstjóri á Ísafirði, f. 16. maí 1893, d. 4. mars 1946, og
Sigríður Gísladóttir húsfreyja, f. 1. desember 1996, d. 15. ágúst 1987. Börn
þeirra eru: 1) Birgir skógarvörður, f. 20. janúar 1951, maki Gróa Erla
Ragnvaldsdóttir kennari, f. 5. maí 1959, börn Dagbjört og Haukur. 2) Rósa
iðjuþjálfi, f. 29. júní 1953, barn Svandís, faðir hennar Sveinn B. Hauksson. 3)
Baldur verslunarmaður, f. 12. ágúst 1954, maki: Steinunn Björk Eggertsdóttir,
starfsmaður Háskóla Íslands, f. 18. september 1960, sonur hans Tryggvi, móðir
Tryggva Karolína Hulda Guðmundsdóttir. Dætur Steinunnar eru Kolbrún, Gunnhildur
og Elísabet.

Haukur tók stúdentpróf frá Menntaskólanum í Reykjavík árið 1936, lauk
kandídatsprófi frá læknadeild Háskóla Íslands 1943 og hlaut sérfræðingsleyfi í
bæklunarlækningum 1948. Hann stundaði framhaldsnám í bæklunarlækningum í
Bandaríkjunum og var aðstoðarlæknir á bæklunardeild Medical College of Virginia
Hospital í Richmond í Virginíu. Hann starfaði einnig sem aðstoðarlæknir á
Massachusetts General Hospital, Robert B. Brigham Hospital í Boston
Massachusetts og á Welch Emergincy Hospital í Welch í Virginíu. Hann sneri aftur
til Íslands árið 1948 og starfaði m.a. sem héraðslæknir í Djúpavogshéraði, við
ameríska sjúkrahúsið á Keflavíkurflugvelli, og Sjúkrahúsið á Akranesi. Árið 1955
varð hann yfirlæknir á Slysavarðstofu Heilsuverndarstöðvar Reykjavíkur og síðar
Borgarspítalanum, slysadeild og starfaði þar þar til hann lét af störfum sökum
aldurs í mars 1974. Jafnframt þessu var hann læknir Styrktarfélags lamaðra og
fatlaðra og aukakennari í meðferð slysa við læknadeild Háskóla Íslands og síðar
dósent og prófessor frá 1979-1984. Hann gegndi ýmsum félags- og trúnaðarstörfum
og átti meðal annars sæti í úthlutunarnefnd bifreiða til fatlaðs fólks og
nokkrum sinnum sæti í dómnefndum vegna stöðuveitinga lækna við Borgarspítalann
og kennslu við læknadeild Háskóla Íslands. Hann var meðlimur í Alþjóðasambandi
slysa- og bæklunarlækna frá 1957 og var lengi fulltrúi Íslands þar. Hann
skrifaði einnig greinar í Læknablaðið og önnur innlend tímarit.

Haukur Kristjánsson

Athugasemd