Guðrún Birna Kjartansdóttir fæddist í Vestmannaeyjum 17. mars 1978. Hún lést á líknardeild Landspítalans í Kópavogi 29. júlí 2017.

Foreldrar Guðrúnar Birnu eru Katrín Guðbjörg Þórlindsdóttir hjúkrunarfræðingur, f. 22.9. 1947, og Kjartan Örn Sigurbjörnsson sjúkrahúsprestur, f. 23.10. 1948. Bróðir hennar er Þórlindur Kjartansson sjálfstætt starfandi ráðgjafi, f. 7.7. 1976, eiginkona hans er Ingunn Hafdís Hauksdóttir endurskoðandi, f. 1.2. 1976. Börn þeirra eru Anton Haukur, f. 22.6. 2008, og Elín Katrín, f. 9.8. 2012.

Guðrún Birna hóf sambúð með Guðmundi Frey Sveinssyni, f. 19.7. 1977 á Akureyri, árið 2000. Þau gengu í hjónaband 3. september 2005. Þau bjuggu í Reykjavík og í Flóahreppi, en lengst af í Kópavogi. Guðmundur Freyr er stjórnmálafræðingur og hefur meistaragráðu í opinberri stjórnsýslu. Hann er fyrrverandi skólastjóri og starfar nú sem sérfræðingur hjá Starfsmannafélagi Reykjavíkurborgar. Börn Guðrúnar Birnu og Guðmundar Freys eru Kjartan Sveinn, f. 18. júní 2002, Bjarki Freyr, f. 18. júlí 2006, og Anna Katrín, f. 26. júní 2011. Heimili þeirra er í Kópavogi.

Foreldrar Guðmundar Freys eru Guðný Anna Theodórsdóttir sjúkraliði, f. 24.8. 1947, og Sveinn Jónasson húsasmíðameistri og fv. kirkjuvörður í Akureyrakirkju, f. 30.7. 1948.

Guðrún Birna ólst upp í Vestmannaeyjum en flutti á Seltjarnarnes haustið 1991. Hún lauk stúdentsprófi af máladeild MR vorið 1998. Guðrún Birna lauk BA-prófi í stjórnmálafræði frá HÍ árið 2003 og MA í Náms- og starfsráðgjöf frá HÍ árið 2010.

Guðrún Birna starfaði á auglýsingadeild Morgunblaðsins 2001-2007. Hún var aðstoðarmaður framkvæmdastjóra og síðar verkefnastjóri á Sérfræðisetri í ævilangri náms- og starfsráðgjöf á árunum 2008 til 2012. Hún var meðhöfundur af ritrýndum fræðigreinum sem birtust bæði hér á landi og alþjóðlega. Guðrún Birna var í forystu fyrir ýmis konar framþróun á sviði náms- og starfsráðgjafar og sótti ráðstefnur víða og tók þátt í samstarfi Evrópuþjóða á því sviði. Hún var formaður starfshóps um stefnumótun í náms- og starfsráðgjöf, skipuð af menntamálaráðherra. Guðrún Birna gegndi einnig starfi náms- og starfsráðgjafa í Flóaskóla og hjá Fjölbrautaskóla Suðurlands á Selfossi um hríð.

Guðrún Birna var ætíð virk í ýmis konar félagsstörfum og sat m.a. í stjórn Vöku, félags lýðræðislegra stúdenta veturinn 2000 til 2001, og í stjórn Félags stjórnmálafræðinga 2009 til 2010.

Guðrún Birna Kjartansdóttir

Athugasemd