Bragi Steinarsson, fyrrverandi vararíkissaksóknari, fæddist í Reykjavík 14. mars 1936. Hann lést 31. október 2012.

Foreldrar hans voru hjónin Steinarr St. Stefánsson verslunarstjóri og síðar bókari, f. 7.4. 1896, d. 25.5. 1980, og kona hans Ása Sigurðardóttir húsmóðir, f. 26.1. 1895, d. 12.4. 1984. Bræður Braga: Leifur vélvirki, f. 29.5. 1927, d. 13.11. 2006, og Atli blaðamaður, f. 30.6. 1929. Hálfsystkini Braga sammæðra eru: Baldur E. Jensson múrari, f. 3.7. 1918, og Anna Margrét Jensdóttir húsmóðir, f. 14.7. 1921.

Eftirlifandi eiginkona Braga er Ríkey Ríkarðsdóttur, f. 28. apríl 1939. Foreldrar hennar voru Ríkarður Kristmundsson kaupmaður, f. 3.6. 1912, d. 5.9. 1970, og eiginkona hans Guðrún Helgadóttir, f. 22.10. 1914, d. 23.7. 1978. Börn Braga og Ríkeyjar eru 1) Eiríkur verkfræðingur, f. 26.10. 1961, kvæntur Guðbjörgu Jónu Jónsdóttur lögg. fasteignasala, f. 13.2. 1961. Dætur þeirra eru Ríkey og Ísabella. Sonur Guðbjargar er Jón Kornelíus Andrésson. 2) Björk hjúkrunarfræðingur, f. 9.9. 1965, gift Kolbeini Arinbjarnarsyni verkfræðingi, f. 10.5. 1962. Synir þeirra eru Arinbjörn og Benedikt. 3) Steinarr flugstjóri, f. 20.1. 1972, kona hans er Kristín Thoroddsen, f. 20.11. 1968. Synir þeirra eru Ingi Þór, Arngrímur Bragi, Daníel Freyr og Ásgeir Steinn.

Bragi varð stúdent frá Verslunarskóla Íslands árið 1956 og útskrifaðist úr lagadeild Háskóla Íslands 1962. Bragi var fulltrúi og deildarstjóri saksóknara ríkisins 1962-1975. Hann var settur vararíkissaksóknari 1975 og skipaður í það embætti 1976. Hann var starfsmaður Alþingis samhliða námi og í aðalstarfi 1960-1980, lengst af sem þingfréttamaður Alþingis í útvarpi 1960-1972. Bragi fór í fjölda námsferða til Kaupmannahafnar og kynnti sér störf og úrvinnslu mála hjá saksóknara Danmerkur og samræmdi við störf saksóknara ríkisins. Bragi kenndi einnig þjóðarrétt við Stýrimannaskólann í Reykjavík 1968-1980. Hann sat í yfirkjörstjórn Reykjavíkurkjördæmis norður frá árinu 2003.

Bragi Jens Steinarsson

Athugasemd