Áslaug Ólafsdóttir fæddist á Þorvaldseyri á Eyrarbakka 9. febrúar 1941. Hún lést á Landspítalanum 11. júní 2012.

Foreldrar hennar voru Ólafur Engilbert Bjarnason verkstjóri, fæddur í Simbakoti á Eyrarbakka 13. janúar 1893, d. 2. október 1983, og Jenný Dagbjört Jensdóttir húsfreyja, fædd í Litlu Tungu, Árbæjarsókn, 12. maí 1897, d. 2. desember 1964. Áslaug var yngst 12 systkina. Systkini Áslaugar eru: Sigrún, f. 1917, d. 2001, Bjarni, f. 1918, d. 1981, Sigurður, f. 1920, d. 2010, Ólafur,
f. 1922, d. 2001, Eggert, f. 1924, d. 1980, Sigurður Bjarnason Ólafsson, f. 1925, d. 1943, Guðbjörg, f. 1926, d. 1994, Margrét Elín, f. 1929, d. 2003, Bryndís, f. 1930, Guðrún Ólafsdóttir Thorarensen, f. 1934 og Sigríður Dagný, f. 1939.

Eiginmaður Áslaugar er Kjartan Kjartansson, trillukarl og fyrrverandi fangavörður, f. 1. ágúst 1932 í Reykjavík. Faðir Kjartans var Kjartan Sigurður Bjarnason,vélstjóri og lögreglumaður, fæddur í Eiríksbúð á Snæfellsnesi, 9. nóvember 1906, d. 26. október 1990. Móðir Kjartans var Magdalena Sesselja Sigurmundsdóttir húsfreyja, fædd á Fossá á Barðaströnd, 24. júní 1904, d. 26. febrúar 1953. Áslaug og Kjartan voru gefin saman í hjónaband 16. september 1993, saman eiga þau soninn Kjartan Örn, f. 9. desember 1971.

Af fyrra sambandi átti Áslaug börnin 1) Margrét Dagbjört Hallbergsdóttir, f. 7. apríl 1958, d. 17. júlí 1977. 2) Jóhanna Björk Hallbergsdóttir, f. 19. febrúar 1962, 3) Ólöf Ingibjörg Hallbergsdóttir, f. 28. ágúst 1963, 4) Hafþór Kristinn Hallbergsson, f. 30. ágúst 1968.

Áslaug ólst upp í foreldrahúsum að Þorvaldseyri á Eyrarbakka og gekk í Barnaskólann á Eyrarbakka og í tvo vetur í miðskóla á Selfossi en eftir það flutti hún til Reykjavíkur. Þegar til Reykjavíkur var komið hóf Áslaug fyrst störf á Mjólkurbarnum við Laugaveg, en síðar vann hún við almenn fiskvinnslustörf á Kirkjusandi og í Ísbirninum, en eftir það starfaði Áslaug við saumaskap hjá Heimilisprýði til ársins 1989, en þá hóf hún störf í kvennafangelsinu í Kópavogi og þar starfaði hún til ársins 2006. Áhugamál Áslaugar voru hannyrðir, hönnun og handverk ýmiss konar en hún var mikið fyrir fallegt handverk.

Áslaug Ólafsdóttir

Athugasemd