Ása Líney Sigurðardóttir fæddist í Kópavogi 1. júní 1959. Hún lést á líknardeild Landspítalans í Kópavogi 20. júlí 2011.

Foreldrar hennar: Pálína Jóhannesdóttir, húsmóðir frá Hamarshjáleigu, Gaulverjabæjarhreppi, f. 2. apríl 1925 og Sigurður Magnús Jónsson, húsgagnasmiður frá Hnífsdal, f. 23. september 1923, d. 13. ágúst 1988. Systkini Ásu: 1) Jón Haukur, f. 12. nóvember 1949, m. Luz Stella Triana. 2) Benedikt Tryggvi, f. 27. janúar 1951, m. Ásta Kristín Níelsdóttir. 3) Elín Stella, f. 29. apríl 1952, m. Helgi Hauksson. 4) Erla Sigurlín, f. 3. maí 1955, d. 8. janúar 1957. 5) Jóhannes Ómar, f. 1. október 1956, m. Soffía Kristjánsdóttir. 6) Sölvi Ellert, f. 21. mars 1958, m. Sigurveig Guðmundsdóttir. 7) Helgi Guðmundur, f. 6. ágúst 1960, m. Guðrún Magnúsdóttir. 8) Einar Már, f. 14. janúar 1965, m. Ellen Baer. 9) Guðrún Fanney, f. 30. maí 1966, m. Laurent Nicolas Bonthonneau.

Ása Líney fæddist í Víðihvammi 3 í Kópavogi, þar ólst hún upp og gekk í Kópavogsskóla til 12 ára aldurs er fjölskyldan fluttist á Bragagötu 30 í Reykjavík. Ása lauk landsprófi frá Kvennaskólanum í Reykjavík 1976.

Þann 14. nóvember 1981 giftist Ása Þorgrími Óla Sigurðssyni, aðstoðaryfirlögregluþjóni, f. 24. júlí 1952. Foreldrar hans: Ingibjörg Þorgrímsdóttir, húsmóðir, f. 20. ágúst 1926 og Sigurður Jónsson, aðstoðaryfirlögregluþjónn, f. 18. mars 1929, d. 8. september 1986. Bræður Þorgríms Óla: 1) Jón Arnar, m. Anna Halldórsdóttir. 2) Þór, m. Ingveldur Guðjónsdóttir. 3) Sigurður Rúnar. 4) Gunnlaugur Valgarð, m. Anna Steinþórsdóttir. Öll sín búskaparár bjuggu Ása og Óli á Selfossi þar sem þau bjuggu fjölskyldu sinni fallegt og gott heimili.

Dóttir Ásu og Páls I. Blöndals Sigurbjörnssonar, f. 15. apríl 1955, er Linda Rós, hjúkrunarfræðingur, f. 22. september 1977, m. Dagur Gunnarsson, tölvunarfræðingur. Börn þeirra: Kristófer, f. 21. október 2003 og Tómas, f. 18. janúar 2008. Börn Ásu og Þorgríms Óla: 1) Sigrún Hanna, meistaranemi í þjóðfræði, f. 6. október 1984, m. Anton Scheel Birgisson, hársnyrtimeistari. Barn þeirra er Líney Hekla, f. 18. apríl 2011. Fyrir á Anton son, Dag Gísla. 2) Sigurður Ingi, margmiðlunarhönnuður, f. 21. desember 1987, m. Særós Ester Leifsdóttir, nemi.

Ása Líney lauk námi í Einkaritaraskólanum, stúdentsprófi frá Fjölbrautaskóla Suðurlands og námi í opinberri stjórnun og stjórnsýslu frá Endurmenntun Háskóla Íslands. Vorið 2010 lauk Ása BS-gráðu í viðskiptafræði frá Háskólanum á Akureyri.

Ása var aðalbókari sýslumannsins á Selfossi síðustu ár. Hún stofnaði og rak, ásamt Lilju Guðmundsdóttir, gjafavöruverslunina Í tilefni dagsins á Selfossi frá 1990-96. Áður starfaði hún m.a. hjá Landsvirkjun og Selfosskaupstað. Ása tók virkan þátt í félagsstörfum, var einn af stofnfélögum ITC Selja og var um tíma forseti deildarinnar. Hún var formaður Framsóknarfélags Selfoss, varabæjarfulltrúi um tíma og sat í ýmsum nefndum á vegum sveitarfélagsins. Helstu áhugamál Ásu voru fjölskyldan, handavinna, ferðalög og garðrækt.

Ása Líney Sigurðardóttir

Athugasemd