Ægir Ólafsson fæddist á Siglufirði 10. mars 1912. Hann lést á hjúkrunarheimilinu Eir 18. ágúst 2005.
Foreldrar Ægis voru Ólafur Sigurðsson frá Flatey á Breiðafirði og Guðrún Baldvinsdóttir frá Siglunesi við Siglufjörð. Systkyni Ægis eru Unnur og Eggert sem voru tvíburar, Dröfn, Bára, Ólafur og Sigurður sem var kornabarn þegar faðir þeirra drukknaði.

Ólafur faðir þeirra var skipstjóri frá Flatey á Breiðafirði og drukknaði þegar skip hans Beautiful Star fórst er Ægir var fimm ára. Guðrún móðir þeirra stóð þá eftir með barnahópinn og brá á ráð að flytja til Siglufjarðar með Unni, Eggert og Ólaf en Bára og Dröfn og Sigurður fóru í fóstur og Ægir fór til Baldvins afa síns á Siglunesi. Þar var Ægir til skólaskyldualdurs og fluttist þá aftur til móður sinnar. Þegar Ægir var 16 ára fluttist fjölskyldan til Reykjavíkur. Hann fór þá að vinna fyrir sér, fyrst sem kúskur á mjólkurkerru sem var í förum milli Gufuness og Reykjavíkur. Hann hafði sára löngun til mennta og komst á seiglunni í Samvinnuskólann sem þá var í Reykjavík undir stjórn Jónasar frá Hriflu. Lauk hann þaðan prófi 1930 sem nýttist honum vel. Hann vann ýmist verkamannavinnu eða verslunarstörf næstu árin, bæði í Hrísey og í Reykjavík. Hann stundaði einnig málakennslu í Keflavík. Ægir fór til náms til Kaupmannahafnar 1936 og lærði verksmiðjuframleiðslu á mansjéttum og hönskum. Næstu árin þar á eftir starfaði hann svo við undirfatagerðina Herkúles h.f. og rak einnig hanskagerð. 1939 fór hann til Svíþjóðar og lærði skógerð, enda menn upp til hópa illa skæddir á Íslandi á þeim tíma. Eftir erfiða tíð kom hann síðan heim með Petsamóferð m.s. Esju. Ægir rak síðan skóverksmiðjuna Þór h.f. til 1941. Hann fór síðan til Bandaríkanna til að afla sér viðskiptamenntunar og bjó þar um tveggja ára skeið. 1944 kom hann heim og stofnaði Mars Trading Company og rak það til 1993. Honum var mikið umhugað um eflingu verslunar Íslands við austur-evrópu og átti í miklum viðskiptum við Sovétríkin m.a. með útflutningi lagmetis og innflutningi á ýmsum iðnaðarvörum. Viðskipti átti hann einnig mikil við Tékkóslóvakíu þar sem hann kynntist seinni konu sinni. Einnig stuðlaði Ægir að eflingu lagmetisiðnaðar og fiskafurðavinnslu á Íslandi og flutti inn til þess gerðan vélbúnað frá Noregi. Eftir að hann hætti eigin atvinnurekstri starfaði hann sem ráðgjafi sjávarútvegsráðuneytisins um nokkurra ára skeið. Einnig sat hann sem meðdómari í verslunardómi.

Ægir var mikill bókamaður og 1964 stofnaði hann ásamt valinkunnum mönnum fornbókaverslunina Bókina h.f. Ægir var einnig einn af stofnendum Félags eldri borgara og starfaði þar á skrifstofu um hríð.
Ægir var mikill áhugamaður um andleg málefni, lífið og það sem tekur við er þessu lífi lýkur. Hann var virkur meðlimur í félagi Nýalsinna og Sálarrannsóknarfélagi Íslands. Einnig var Ægir félagi í Frímúrarareglunni á Íslandi og veitti það honum góðan styrk.

Ægir var tvígiftur. Fyrri kona hans eftirlifandi er Lára Helga Gunnarsdóttir fóstra. Þau Ægir áttu saman tvö börn þau Guðrúnu Unni og Gunnar Inga. Börn Guðrúnar eru Stefán, Sigurlaug og Ægir Gauti. Börn Gunnars eru Guðrún Ýr, Inga Hrefna og Atli.

Seinni kona Ægis var Jarmila Vera Friðriksdóttir frá Prag – Tékkóslóvakíu, dáin 1991. Hún átti fyrir tvö börn þau Benno Georg og Marcelu Margréti og gekk Ægir þeim í föður stað. Benno er kvæntur Unni Jónu Sigurjónsdóttur og dóttir þeirra er Súsanna. Fyrir átti Benno Helgu.

Barn Marcelu er Valgeir Ægir og er sambýlismaður Marcelu Helgi Bergmann Ingólfsson.
Börn Ægis og Jarmilu eru Ólafur Friðrik kvæntur Guðrúnu Lindu Einarsdóttur. Börn Ólafs og Guðrúnar eru Andri Snær, Vera Sjöfn og Silja Sigrún. Dóttir Ægis og Jarmilu er Eva Guðrún, gift Jóni Oddi Davíðssyni. Börn þeirra eru Árni Þór og Telma María.
Útför Ægis fór fram fimmtudaginn 25. ágúst 2005 í Bústaðakirkju kl. 13.

Ægir Ólafsson

Athugasemd