Aðalheiður Helgadóttir fæddist á Grund í Kolbeinsstaðahreppi 10. maí 1939. Hún lést á Landspítala – háskólasjúkrahúsi í Kópavogi 28. maí síðastliðinn.

Foreldrar hennar voru Sigríður Guðbjörg Kaprasía Sigurðardóttir, f. 22. janúar 1917 í Viðey, d. 6. maí 1993, og seinni maður hennar Helgi Guðjón Guðmundsson, f. 4. júní 1898 á Rauðkollsstöðum í Eyjahreppi, d. 8. febrúar 1965. Systkini Aðalheiðar eru dóttir Sigríðar og fyrri manns hennar Þorsteins Jóhannessonar er lést 1936, Inga Sigurlaug Þorsteinsdóttir, f. 1. nóv. 1934, og alsystkinin Sigurður Þorsteinn Helgason, f. 4. júlí 1940, Guðmundur Helgason, f. 30. apríl 1943, og Skúli Magnússon, f. 5. okt. 1944, d. 8. maí 2003. Kjörforeldrar Skúla voru systir Sigríðar, Jódís Þóra Sigurðardóttir, f. 4.6. 1914, d. 1998, og maður hennar Magnús Ásgeirsson Magnússon, f. 2.3. 1912, d. 2.6. 1947. Aðalheiður ólst upp á Laugarnesvegi 78 (Bjarmalandi) og Grund í Kolbeinsstaðahreppi þar sem hún dvaldi hjá föðurfólki sínu þeim Ásmundi Guðmundssyni og k.h. Jónu Þórunni Snæbjörnsdóttur á sumrin öll bernskuárin og leit hún æ síðan á Grundarheimilið sem sitt annað heimili og fjölskylduna þar sem sína.

Hinn 17. desember 1960 gifist Aðalheiður Kristjáni Þór Þórissyni fv. skrifstofustjóra, f. 28. jan. 1932, og eignaðist með honum einn son, Steinþór, f. 7. júlí 1961. Hann á þrjú börn, a) Aðalheiði Rósu, sem er í sambúð með Þóroddi Ingvarssyni, og eiga þau soninn Ingvar; b) Guðrúnu Tinnu, og c) Kristján. Aðalheiður ól upp tvær dætur Kristjáns frá fyrra hjónabandi, a) Önnu Þuríði, f. 16. júní 1954, hún á tvö börn, Írisi T. Kristjáns, og Þóri; og b) Kristínu Þóru, f. 28. mars 1957. Kristín á Sólveigu og Davíð Rolfsbörn og Katrínu Ólöfu Georgsdóttur. Auk þess átti Kristján dæturnar Þorgerði og Sif, sem gift er Trausta Þór Ósvaldssyni.

Aðalheiður stundaði nám í Reykholtsskóla í þrjú ár og lauk landsprófi 1957. Haustið 1957 fór hún í nám í Íþróttaskólanum á Laugarvatni og lauk prófi 1958. Fljótlega eftir það hóf hún störf við Langholtsskóla í Reykjavík og starfaði þar í um 30 ár. Einnig nokkur ár í Laugargerðisskóla á Snæfellsnesi.

Aðalheiður Helgadóttir

Athugasemd