Ásólfsskálakirkja /  Ásólfsskálakirkjugarður

Kirkjulýsing:
Holt undir Eyjafjöllum var kirkjustaður frá fyrstu kristni og til loka 19. aldar. Allra heilagra kirkja í Holti var ein af höfuðkirkjum Rangárþings, gekk þar næst Odda og Breiðabólstað, enda voru eignir Holtskirkju miklar og prestakallið eftirsótt. Hafa ýmsir af merkustu mönnum íslenskrar kirkju setið í Holti á liðnum öldum.
Holtskirkja skekktist á grunni í miklu ofviðri 1888. Var staðnum í Holti hætt við eyðingu af völdum Holtsár. Og var því ákveðið að endurbyggja kirkjuna að Ásólfsskála, sem var eignargjörð hennar að hálfu. Var þeirri byggingu lokið 1889. Að Ásólfsskála hafði staðið kirkja í kaþólskum sið og fram til loka 16. aldar. Var hún helguð Ólafi konungi. Að Ásólfsskála byggði fyrstur að sögn Landnámu Ásólfur alskik, sem síðar var tignaður sem helgur maður í Hólmskirkju á Akranesi.
Ásólfsskálakirkja sem byggð var 1889 var timburkirkja með turni, byggð á hlöðnum grunni, vönduð að byggingu að sinnar tíðar hætti, en stóðst þó svo illa tönn tímans, að á hálfrar aldar afmæli hennar var þegar farið að ræða um endurbyggingu hennar. Hafði sr. Jón M. Guðjónsson þáverandi prestur í Holti mikinn áhuga fyrir framgangi þess máls og í tíð hans var steyptur grunnur að nýrri kirkju. Var honum valinn staður í hlíðinni suðaustan hinnar gömlu kirkju og utan kirkjugarðs. Er þar fagurt kirkjustæði og horfir vel við öllu, er um veg fram. Árið 1952 var hin gamla kirkja rifin að grunni og byrjað á byggingu nýrrar kirkju á hinum steypta grunni. Byggt var eftir teikningu frá Húsameistara ríkisins. Yfirsmiður við byggingu kirkjunnar var Sigurjón Magnússon bóndi í Hvammi. Leiddi hann verkið af einstökum áhuga og fórnfýsi og hefur hlotið þann heiður að andlitsmynd hans steypt í eir er upp sett í forkirkju, gjöf frá frú Hönnu Karlsdóttur í Holti. Við byggingu kirkjunnar sýndu sóknarmenn allir mikinn samhug og lögðu fram geysimikið starf án endurgjalds.
Kirkjan var vígð af Ásmundi Guðmundssyni biskupi árið 1955.
(Stuðst við samtekt eftir Þórð Tómasson Skógum)


Framkvæmdir/endurbætur

Frá 1967 til 1974 var unnið af endurbótum kirkjunnar og var það mikið og kostnaðarsamt starf. Ullarteppi lögð á gólf og ganga og aflað fjár með því að sóknarbörn skutu saman ull vorsins og lögðu hana til verksmiðjuna ÁLAFOSS, og nægði þetta framlag að mestu, málning var endurnýjuð og harðviðargluggar smíðaðir í suður hlið kirkjunnar.
1974 var seta og bak á bekkjum klædd með svamp og leðurlíki.
Snyrtiherbergi endurnýjað, flísalagt og innréttað 1990.
Máluð kirkja að utan 1991, að innan 1992.

Suðurhlið kirkjunnar einangruð og klædd m/ stáli 1988,
austurhlið 1993 og þakskegg endurbætt 2004 múraði Sigmar Sigurðsson Sauðhúsvelli 4 af 7 stólpum í kirkjugarði.

Árin 2005-2007 voru miklar endurbætur gerðar á kirkjunni.
Endurnýjaðir gluggar á turni og norðurhlið með tvöföldu gleri, endurnýjaðar þakrennur, aukalega settar rennur á turn, járnklædd norðurhlið ásamt gengið frá járni í glugga, málaður turn, framhlið, þak og allir gluggar innan sem utan, skipt um gler í gluggum þar sem skemmd var til staðar, málaðir stólpar í kirkjugarði, Um framkvæmdina sá Viðar Bjarnason Ásólfsskála.
Tröppur voru endurgerðar árið 2000 af Steingrími Jónssyni Kálfholti.
Handrið við neðri tröppurnar smíðað og sett upp af Sigurði Jónssyni Varmahlíð.
Kirkjan var hituð með rafmagnsofnum til ársins 1996 þá var tekin inn hitaveita og settir upp ofnar í samræmi hitunina, það gekk ekki sem skildi og var samningi rift við kirkjuna 2003 og sett upp rafmagnshitatúpa af Magnúsi Bjarnasyni Hvolsvelli (frá Skálakoti).


Ásólfsskálakirkjugarður

Heimreið breikkuð og bílastæði stækkað og einnig sett upp flóðlýsing við kirkjuna 1994. Fyrir lá teikning um þetta ásamt stækkun kirkjugarð hannað af umsjónamanni kirkjugarðanna Guðmundi Rafni Sigurðssyni.

1996 haldið áfram samkv. teikningu stækkun kirkjugarðs og var þá sameinaður garður utanum kirkjuna og kirkjugarður og stækkaður örl. norðar og ný girðin.
Rifin girðing meðfram garði að austan og sunnanverðu (meðfram heimreið) ekki talin þörf á henni lengur. Hlaðin grjót meðfram gangstétt og sem einnig er ný. Þessi vinna var gerð að mestu af heimamönnum.

Hirðing garðsins var í umsjá sóknarbarna sem komu einu sinni að sumri til að slá og raka. Árið 2000 tók Katrín Birna Viðarsdóttir að sér verkið sem var sláttur og hirðing 3 sinnum yfir sumarið og annað sem tilheyrir hirðingu kirkjugarðs, 2007 var ráðinn verktaki í verkið Helgi Jens Hlíðberg frá Hvolsvelli og sér hann einnig um hirðingu Holtskirkjugarðs.


2018 eru starfsmenn eftirfarandi:

Í sóknarnefnd eru: Katrín Birna Viðarsdóttir Ásólfsskála formaður,
Meðstjórnendur, Edda Ævarsdóttir Nýjabæ og Guðlaugur Einarsson Ysta Skála sem er einnig meðhjálpari og safnaðarfulltrúi.
Sóknarprestur : Sr. Haraldur M Kristjánsson í Vík

Organisti: Guðjón Halldór Óskarsson Miðtúni

Hringjari: Gumundur Jón Viðarsson Skálakoti