Vellir eru kirkjustaður og áður prestssetur í Svarfaðardal utanverðum að austan. Prestssetrið var flutt til Dalvíkur árið 1967. Kirkjan er úr timbri. Enginn turn er á henni fremur en öðrum kirkjum í Svarfaðardal. Meðal góðra gripa kirkjunnar er predikunarstóll frá 1747 og gömul altaristafla með vængjahurðum. Þá er í kirkjunni mjög gamall ljósahjálmur og tvær koparljósastikur á altari mjög fornar. Á Völlum bjó á söguöld Valla-Ljótur Ljótólfsson. Var hann uppi í lok 10. aldar og á öndverðri 11. öld. Hann átti í miklum deilum við Guðmund ríka á Möðruvöllum. Af Valla-Ljóti er til sérstök saga.